لو متابع التطورات اللي حصلت الفترة الأخيرة يبقا أكيد سمعت عن مشروع Star link و لو متعرفش مفيش مشكلة تابع بس للأخر و انا هفهمك كل حاجة
دلوقتي احنا مصر معظمنا أو كلنا تقريباً بنشتكي من الانترنت أما من السرعة أو الباقة اللي بتخلص قبل بداية الشهر طب ده في مصر في بقا مناطق تانية في بعض الدول عندهم انترنت ضعيف و بأسعار مرتفعة جداً غير بقا المناطق اللي في الصحراء و مش واصلها انترنت اصلاً, شوفت بقا أن أنت في نعمة
المهم خلينا في موضوعنا جيه بقا واحد اسمه ايلون ماسك ده رجل اعمال كندي و عنده شركات كبيرة المهم ايلون ماسك لما شاف الكلام ده معجبهوش و قال الانترنت ده لازم يوصل للعالم كله و بأسعار تناسب الكل.
و بالفعل بدأ مشروع اسمه Star link المشروع ده عبارة عن مجموعات كبيرة من الأقمار الصناعية بتدور حول الأرض حاجة كده زي الاقمار الصناعية بتاعت قنوات التليفزيون بس الفرق إن ده علي ارتفاع اقل و عدد أكبر علشان يغطي الأرض كلها
و حسب كلام ايلون ماسك فالعدد إن شاء الله هيكون 12 000 قمر صناعي عارف انك اتخضيت من الرقم بس ده رقم طبيعي لأنه عايز يغطي الأرض كلها.
الحقيقة إن فكرة زي دي لما تتنفذ:
هنشوف سرعات انترنت عالية جداً ممكن تتفوق علي 4G و 5G
الباقات هنا هتبقي غير محدودة مش 140GB
الميزة الثالثة انه هيبقا أفضل من الكابلات اللي تحت الأرض في DSL و هيبقا مستقر مفيش بقا كابل نحاس و كابل فايبر و الكلام اللي نسمعه من الشركات هنا في مصر
الميزة الرابعة و هي الأسعار لأن حسب كلام ايلون ماسك إن السعر هيبقا قليل علشان يوصل لكل الناس
أخر حاجة بقا هي ممكن نعتبرها ميزة و عيب في نفس الوقت هي الأمان ميزة لأن مفيش قيود من الدولة أو من مزود الخدمة علي المواقع اللي يتم زيارتها
لحد دلوقتي الكلام حلو لكن بالرغم من أنها فكرة حلوة لكن علي أرض الواقع ممكن تقابل مشكلة في البنج لأن المسافة اللي بين الارض و القمر الصناعي كبيرة و دا ممكن يعمل مشاكل معاك لو أنت جيمر او ستريمر لكن الشركة اتكلمت في الجزء ده و قالت إن مش هيبقا في مشاكل و البنج هيبقا زي الـ DSL و الـ 4G و إن شاء الله لما تبدأ التجربة الفعلية الموضوع هيوضح أكتر
طب ماشي يعم دلوقتي هي هتدخل مصر امتي و اشترك فيها ازاي
لحد دلوقتي تم اطلاق 64 قمر صناعي و ايلون ماسك بيقول أن احنا هنبدأ نشوف الخدمة دي و نجربها خلال 3 شهور و بالفعل موقع الشركة مفتوح دلوقتي و تقدر تدخل تسجل فيه و ممكن تبقا من اللي هيجربوها هتدخل علي الموقع ده:
https://www.starlink.com/
و تتدخل الإيميل بتاعك و الرمز البريدي و الدولة و هم ممكن يتواصلوا معاك لما البرنامج التجريبي يبدأ
*ملحوظة صغيرة هنا: الشركة مش هتختار أي حد في البرنامج التجريبي هما هيختاروا فقط المناطق اللي مهتمة بالموضوع و لازم تتأكد من بياناتك علشان يقدروا يتواصلوا معاك*
بس كده يا ريت بقا منتساش تقولنا في التعليقات رأيك في فكرة زي دي
تعليقات