"لقد أصبحت وسائل التواصل الاجتماعي جزءاً أساسياً في حياة العديد من الأشخاص و لم يعد تخزين البيانات مقتصراً علي الأجهزة التي يمكنك الوصول إليها محلياً. كما لم يعد الموقع الجغرافي لأجهزة التخزين عاملاً مؤثراً في تخزين البيانات في المواقع البعيدة أو نسخها احتياطياً."
دي جملها قرأتها علي الإنترنت و حبيت أشاركها معاكم و علي عكس ما الجملة دي تبان صغيرة لكنها بتعكس معني عميق لو فهمت معناها و حطيها في دماغك أثناء تواجدك علي الانترنت فاطمئن أنت في آمان أما بقا لو لسه مش فاهم معناها للاسف يا صديقي العزيز أنت كده بتضر نفسك و بياناتك كلها في خطر و هتقع في مشاكل كتير علشان كده أنا عملت الموضوع ده
نرجع بالتاريخ شويه كده أيام لما كان البريد هو وسيلة التواصل بين الناس فاكر كنت بتاخد وقت قد ايه علشان تبعت رسالة لواحد في محافظة تانية و بعد كده تستني أنه يبعتلك رد مع انه معاك في نفس الدولة ما بالك بقا لو كان في دولة تانية أو في قارة تانية
دلوقتي بردو وسائل التواصل الاجتماعي زي فيسبوك و تويتر تقريباً نفس الفكرة بس الفرق أنك بدل ما كنت بتستني الرسالة و مش عارف هتوصل امتي لا دلوقتي الوضع بقا أفضل شوية, طب ازاي بقا؟
الانترنت ده مش الفيسبوك أو اليوتيوب أو اللعبة اللي أنت بتلعبها لأ ده شبكة واسعة جداً بتربط بين الدول و القارات مكونة من مجموعة من الأجهزة منهم الراوتر اللي موصلك بالانترنت المهم خلينا في الموضوع هسألك سؤال و فكر في إجابته أنت دلوقتي لما تبعت رسالة لأخوك اللي بره ايه اللي بيحصل او بتوصله ازاي أكيد الرسالة مش هتطير ترحله ده مش حمام زاجل
دلوقتي أنا كتبت الرسالة و ضغطت علي إرسال بعد كده الرسالة دي عن طريق شبكة الانترنت هتوصل لجهاز تاني اسمه سيرفر (Server) أو خادم ممكن تعتبره مكتب بريد بس بدل ما كان مكتب بريد عندك و مكتب بريد عند أخوك لا دلوقتي هو مكتب واحد مشترك بيربط بينكم انتوا الاتنين كل اللي بيعمله أنه بيستقبل الرسالة منك يخزنها عنده في قاعدة بيانات هتسأل طب يعني ايه قاعدة البيانات هقولك قاعدة البيانات دي حاجة زي الأرشيف بيخزن فيها الرسالة لحد لما أخوك يطلبها لحد دلوقتي الكلام حلو هنا بقا تيجي المشكلة زمان مكتب البريد مكنش بيفتح الرسالة و كان بيبعتها لأخوك مباشرة أما بقا السيرفر بيفتح الرسالة و يخزنها عنده و لما أخوك يطلبها يبعتله نسخة منها و نسخة تانية يسيبها عنده
طب ايه المشكلة عادي يعني لا هنا في مشاكل كتير:
أول حاجة إن لو حد إخترق حسابك يقدر يشوف كل الرسائل اللي بينك و بين اي شخص و السيرفر هيبعتله الرسائل لأن الهاكر بيطلبها باسمك
المشكلة الثانية إن ممكن الشخص اللي بتكلمه و بثق فيه أخوك مثلاً حد يخترق حسابه و يكلمك باسمه و يطلب منك بيانات سرية أو معلومات مش المفروض يعرفها و ساعتها أنت هتديها له علي أنه أخوك
المشكلة الثالثة ان السيرفر ده لو تعرض للاختراق ساعتها اللي الهاكرز يقدروا يوصلوا لكل الرسائل اللي في قاعدة البيانات
المشكلة الرابعة إن رسائلك كلها مع الشركات زي فيسبوك و تويتر حسب الموقع اللي بتستخدمه يقدروا يفتحهوها و يقرؤا اللي فيها
غير مشاكل تانية كتير ممكن تعرضك و تعرض بياناتك للخطر
طب أعمل ايه دلوقتي انا مقدرش استغني عن الانترنت اقولك شوية نصائح كده تحمي بيها نفسك و أنت بتستخدم الانترنت:
أول حاجة لازم تعمل باسورد قوي للحساب بتاعك و أهم حاجة تقدر تحفظه يعني مش مع كل تسجيل دخول تغيره
معظم المواقع دلوقتي بتدعم ميزة التحقق بخطوتين لازم تفعلها في المواقع اللي بتدعمها و هسيبلكم الرابط في أخر الموضوع
اعمل لكل حساب باسورد مختلف تقدر تحفظه و بلاش تستخدم نفس الباسورد لأكتر من حساب يعني متعملش الفيسبوك بنفس باسورد جيميل لان لو حد قدر يخترق حساب; ميوصلش لباقي الحسابات
و اللي أهم من ده كله إنك متتكلمش في أي موضوع سري علي الإنترنت
أخر حاجة أنك متبعتش أي بيانات شخصية زي مثلاً باسورد أو رقم فيزا أو أي بيانات لأي حد علي الإنترنت حتي لو أخوك لأنت مش عارف مين اللي بيشوف الرسائل دي
بس كده متنساش بقا تشير الموضوع ده علشان يوصل لكل الناس و يا ريت تدعمنا تحت في التعليقات علشان نستمر و نقدر نفيد و نستفيد
التحقق بخوطتين اضغط هنا
تعليقات